Qt p jam tangan menunjukan pukul 16.30, kondisi badan yg so sadiki mendingan karna kemarin ada ta ojo, totofore dapa panas kasiang... Qt so siap brangkat, ini mo pulang Tondano. mo urus diri nanti bale besok sore...
Deng ini motor dinas qt kaluar desa Poopoh Kec. Tombariri, desa tampa qt ada praktek akang for stase terakhir komunitas. Matahari masih sadiki panas di blakang pa qt..,dapa 2 jembatan kayu di batas desa (dpa tako lei ini jembatan) 7 kilo kira-kira dari Poopoh sampe dapa jembatan Ranowangko, dapa jalan trans, belo kanan Desa Sarani Matani. Udara masih panas khas pesisir pantai. Kecepatan kira-kira 40-60 km/jam deng ni motor.
Nda brapa lama dapa Desa Lemoh, qt nintau leh ini Lemoh apa, soalnya dorang so pemekaran. Ini Desa so termasuk besar kwa, sore-sore bagini memang rame kote pinggir jalan deng orang-orang, mo tua muda kurang sama. Disini komang so dpa lia rata-rata depe wewene kulit ubi kupas noh. Maklum katu, di desa qt ada prkatek akang kadang mo dapa lia tu bagitu. Kaluar Lemoh, dapa kamari Lolah, dorang leh pe desa so pemekaran, sama lagi dpe orang-orang di jalan (rata-rata katu Minahasa noh mo coba wona :P). Dari Lolah maso Desa Ranotongkor, nda jaoh beda deng yang sebelumnya mar di sini so dpa lia itu Gunung Lokon mantap memang dpe pemandangan ini. Ini desa terakhir di jalan potong lokon sebelum maso daerah administrasi Kota Tomohon (cuma administrasi yang beda, Suku tetap bataria "I Jajat U Santi"). So mulai komang dapa rasa dpe dingin, ini jalan kurang ada nae-nae trus. Di muka pa qt ada kijang itam pick up, full loaded alias banya penumpang di kas, dari oma-opa sampe anak-anak, nintau dorang dari mana ini, baku iko jo supaya rame, jalan lei nembole bakudapa oto musti brenti :P.
Nda dapa rasa dapa batas desa ta tulis "Anda Memasuki Desa Taratara" so lebeh dingin tu udara sini, Gunung Lokon jelas skali dari sini, tambah tu sinar matahari senja ada ta pancar di gunung, memang mantap katu, sayang qt p kamera ada kase tinggal for tamang-tamang mo pake survei desa. Ujung Taratara dapa jalan tre (lurus) kiri kanan sawah, motor tancap gas lari 90, klo 100 so ba goyang kwa, tako qt :P.
Dpa kamari Woloan, sudut pandang lain dari gunung Lokon, mar ini komang tu matahari smo maso, ba capat sadiki jang ta dapa malam di rurukan, maklum cuma mo potong gunung karna tako iko jalan basar dpa swepeng, SIM so lewat kwa. Hmmmh, maso kota Tomohon, iko perempatan kubur Wenas, nae Talete, trus terminal atas Tomohon, rencana mo isi minyak (bensin) lantaran dari Woloan so di bawah garis kasiang tu jarum minyak. Jiah noh, nda ada minyak di atas, terpaksa turun ulang ka bawah. Isi satu liter, si putih (nama motor dinas gue :P) siap mendaki tanjakan gunung rurukan. (Mahawu). Nae Rurukan sampe di atas so pe dingin maklum so gelap, turun-turun rurukan OMG, seblah kiri Gunung Klabat dpe kaki Aermadidi dpa lia deng dpe lampu-lampu, di seblah kanan danau Tondano deng samua perkampungan pesisir deng dpe lampu dapa lia kelap-kelip klo lia dari jaoh. Konk tu Kota Tondano pe pemandangan dang, biar kita so brapa kali lia masih ja badiri bulu-bulu nyawa ja lia. Nda dpa rasa so dapa Sumalangka, dapa Rumah dinas Bupati Minahasa. Maso kanan, maso kiri jalan sblah di Dinas BPMD, dpa Tuama pe rumah..(*rumah lama)
Sampe di rumah Tepar, dapa kompres air panas, minum obat. Ta sono.
Besok jam yang sama mo bale ulang Poopoh
God Bless You
4 September 2013, Minahasa
Tidak ada komentar:
Posting Komentar